قصيده غزليه رائعه

بسم الله الرحمن الرحيم

عهدي بها قـدّام تلبـس عبايـه وأنا بعد قبل البس شماغ وعقـال

طفلين نتهجّـى حـروف البدايـة الله ياما أجمل سواليـف الأطفـال

كانت لنا في كـل شـارع حكايـة وكنّا نقول علوم ماهيـب تنقـال!

وكنت أتقاسـم مامعاهـا معايـه من(عسكريم) التوت,للعلك أبو ريال

وكانت بعكسي شاطره في القرايـه تقرأ جـزء عـمّ وطـه والأنفـال

وأنا لك الله مـن مـواري غبايـه مدري أبو نقطه هو الـذال أو دال

وكانت لأبويه تشتكي من شقايـه وتعلّمه كيف اربط البـاب بحبـال

ياما على ظهري كسر من عصايه يقول لي:خلّك وأنـا أبـوك رجّـال

وأمي تقـول:ادع لولـدك الهدايـه خوفي تصيبه كثرة الضرب بهبـال

لاشفتها مـع أول الـدرب جايـه مدري أنا اللي ملت ولاّ الوطا مال!

أحس قلبي يرتجف فـي حشايـه ما كنّه ألا الضيف لاهـزّ فنجـال

ياما عن"السّعلي" تخبّـت ورايـه لاخوفوها فيه ثـم شافـت أظـلال

تقول:خلّـك يامحـمـد معـايـه واسّتأنس العب عندها دور الأبطال

وأغار حتّى من عيـون اصدقايـه لاطالعوهـا قلت:تكفـون ياعيـال